Hosea 8
Israel in Pingpei At ding
1“Na pengkul na muk tawh tuah in!Mite in ka thukhun palsatin,
ka thukham lehdo khin uh ahi manin a
TOPA innkuante tungah muvanlai khat a om hi. b
2 Israel in kei tungah,
‘Kote Pasian aw, nang kong thei ta hi!’ ci-in hong kiko hi.
3 Ahi hangin Israel in a hoih nial khin zo hi;
galte khat in amah a nungdelh ding hi.
4 Kei thukimna loin kumpite koih uh a,
kei kipsak lohin gam ukte a teel uh hi. c
Amaute mah a siat nadingun
amaute mah in
ngun le kham tawh milimte a bawl uh hi. d
5 Samaria aw, na bawngno lim paikhia in! e
Tuate langah ka hehna kuang hi.
Amaute bangtan vei siantho thei lo lai ding hiam?
6 Amaute Israel pan ahi uh hi!
Hih bawngno - khutsiampa bawl ahi hi;
Pasian ahi kei hi. f
Tua Samaria bawngno
kisunen ding hi. g
7 “Amaute in huih vawh uh a,
pingpei a at uh hi.
Ankung in vui nei lo-a,
tua in annel a piangsak kei ding hi.
A tang gahsak ta leh
gamdangte in valhtum ding uh hi. h
8 Israel kivalhtum hi;
tu-in amah kimanna a nei lo na khat bangin
minamte lakah a om hi.
9 Ahang in a tangtat gamsung laa bangin
amaute Assyria ah paito uh hi.
Ephraim amah leh amah a lawmpate tungah a kizuak khin hi.
10 Minamte lakah amau le amau a kizuak khit uh hangin
tu-in amaute ka kaikhawm kik ding hi. i
A thahat kumpipa netniamna nuai-ah
amaute a thakiam uh kipan ta ding hi. j
11 “Ephraim in mawhna hanga biakna dingin biakna-tau tampi a dawh hangin k
hihte mawhna bawlna tau a suak hi. l
12 Amau adingin ka thukham nate tampi gelh ta leng,
a tuamdang na khatin a sim uh hi.
13 Amaute in kei tungah hong kipia biaknate
hong pia-in a sa ne uh a,
ahi hangin tuate ah TOPA a lungkim kei hi.
Tu-in amah in amau gitlohnate ciamteh dinga, m
a mawhnate uh dan pia ding hi.
Amaute Egypt ah kileh kik ding uh hi.
14 Israel in amah a Bawlpa mangngilh hi; n
kumpi-inn a lam hi.
Judah in khuapi neu tampi kulhin a um hi.
Ahi hangin a khuapite uh tungah mei ka sawl dinga,
a kulh muanhuaite uh tua in a kang tum ding hi,” a ci hi. o
Copyright information for
ZomZIV